Perforto Regas

Perforto regas. Mortis milionoj
por “fini pri militoj”—kaj militoj
okazas plu en ĉiuj regionoj
kun miloj da senkulpaj mortigitoj.

Perforto regas. Sur la stratoj urbaj
minacas civitanojn domrabado,
eksplodas bandoj en batiĝoj turpaj,
drogitoj svarmas en timiga grado.

Regatojn rabas la reganta klaso
cinike, sub ŝajnigo de moralo.
Perforto regas, kaj la homa raso,
danĝere drivas, rande de l’ ĝangalo.